నాకూ కావాలి ఒక పచ్చని తురాయి చెట్టు నీడ
నాకూ కావాలి విరహాన్ని ఓర్చే రెప్పల నీడ
… ఒక అనుభూతి…చెంపల కెంపులను సాన పెట్టేది
ఒక చక్కర చూపు….గుండె గదుల్లో తీగ పాకం పట్టేది
నాకూ కావాలి రవ్వంత నిప్పు
నాకూ కావాలి చినుకంత తడి
ఒక తిన్నె లాంటి వెన్నెల….మెత్తటి చప్టా కట్టి, నా కథలు వినేది
ఒక ప్రశ్న…..నా జవాబులన్నింటిని చుట్ట చుట్టి గోదార్లో విసిరేసేది
నాకూ కావాలి పరిగెత్తించే ఒక క్షణం
నాకూ కావాలి ఎద మూలల్లో తప్పిపోయిన ఉద్యానవనం
ఒక జలపాతం….నా హృదయ రాగాలను తనతో తీసుకుపోయేది
ఒక వెచ్చటి కంబళి….నా నరాలలోని మంచును ఆవిరిచేసేది
నాకూ కావాలి నా పైన విస్తరించిన ఆకాశం
నాకూ కావాలి పల్చటి ఆశల రెక్కలు
ఒక రూపం…ఆత్మను సైతం ఆరాధ్యదాయకం చేసేది
ఒక చిక్కటి గొంతు….నా అంతర్లీన భావాలను బహిర్గతం చేసేది!!!
